Blog nan Oran

ALBA GU BRÀTH aig Donnchadh MacDhunLèibhe

2010-02-03T13:51:00.000-08:00

A dhùthaich ghaoil 's ro fhad do shuain,
Dèan mosgladh grad a dhìon do shluaigh,
Le d' chlaidheamh sgar an ceangal cruaidh
Chuir sinn an sàs;
Is cluinneam rithist gàir do luaidh,
Alba gu bràth!

Nuair a dh'aontaich thu do chòir 's do cheart
Do bhuadhan sònraichte 's do neart,
Do shaorsa òirdheirc is do reachd,
A thoirt do chàch
'S nach èireadh tuilleadh slòigh no feachd,
Alba gu bràth!

Bha dòchas àrd agad an sìth
An nì a ghnàth air 'n robh thu 'n tì,
Is chunnartaich thu d' uile bhìth
An cùirt do nàmh,
Ach cha toir sin dhuit fois o strì,
Alba gu bràth!

Chaidh deala chìocrach 'n sàs nad fheòil,
Is dheoghail i le d'fhuil do threòir.
Cha sàth le aintighearnas a leòir,
'S gun ioc, gun tàmh
Bha Sasann an geall air crìch do sgeòil,
Alba gu bràth!

Is feuch an-diugh do ghlinn 's do chluain
Nan dìthreibh fàs; is thall thar chuain
An dùthchannaibh cèin tha sliochd do thuaith
Nam buadhan àigh
Nach iomchaidh stad chur anns an ruaig
Alba gu bràth!

Is iompachadh o'n cheangal chlaon,
An cuibhreach a chuir sinn an daors',
An sgleò air inntinnean ar daoin',
An ribe sàs
Ma mhaireas e chan fhaic thu saors',
Alba gu bràth!

O beuc an leòmhainn mar bu nòs,
Cha seas an nàmh ri stràc do spòig,
Is gairm a-rithist na fir mhòir
Don dùthchas spàirn,
'S thig caochladh gad ad neart 's ad threòir,
Alba gu bràth!

A dhùthaich ghaoil 's e saors' do bhrìgh,
Cha soirbhich leatsa bhith fo chìs;
Neo-eisimileach a-rithist bidh,
Mar bha thu tràth,
Nad lòchran soillse do gach tìr
Alba gu bràth!

'S os cionn gach nì an saoghal nam beò,
Cho fad 's a mhaireas dhuit an deò,
Na leig led Ghàidhlig dol fo sgleò
Ma gheibh i bàs
Bidh tu seachran anns a' cheò
Alba gu bràth!

'S i a' Ghàidhlig suaicheantas na saors',
Chan fhuiling ise tàir no daors';
Chan fhuiling snaoim, no cuing, no taod;
Cha sin a gnàth;
Chan fhuiling ise cuibhreach maoir,
Alba gu bràth!

Tha saorsa toinnte anns gach fuaim
An cànain àlainn bhlàth ar luaidh,
Nach fhuiling tàir an càs no 'n cruas
Biodh ise slàn,
'S chan èirich nàmh a bheir ort buaidh
ALBA GU BRÀTH!

Whitney Houston a-rithist

2010-01-19T16:17:00.000-08:00

B' e seo Whitney a bha na cùl-taic do Dhionne Warwick, 's i a' seinn an òrain ainmeil "That's what friends are for." Thàinig Whitney a-steach ann an teis mheadhan an t-seinn aig Dionne nuair a bha feum aig a co-ogha oirre - às a-sin, fhuair sinne tiota beag de sheirm eugsamhail a dh'fhàg a làrach luachmhor nam chuimhne. Tiota tìm an àigh. Mòmaid mhìorbhaileach.

Brosnachadh Bhruis (Scots Wha Hae)

2008-12-13T22:22:00.000-08:00

‘Threun’, le Uallas, dh’fhuiling creuchd!‘
S le Bruis chaidh dàn’ gu àr nan euchd!
Nis iarraibh bàs am blàr nam beum,
No buaidh gu treun ‘san strìth!

Seo latha ‘chruais—an uair tha làth’ir!
Feuch feachd fo’n cruaidh air cluan an àir!
A' teachd le’n uaill gu buaireas blàir!
A dheanamh tràillean dhìbh!

Có thig do’n strìth neo-dhìleas, claon?
Có dheanadh uaigh ach cluan an raoin?
Có striocadh sios gu dìblidh faoin
Air cùl nan claon-fhear clìth?

Có ‘n càs an rìgh, a rìoghachd ‘sa reachd,
Bheir beum nan geur-lann treun an gleachd,
Gu buaidh am blàr, no bàs ‘na bheachd,
An gaisgeach leanadh mi

Ar truaighe ‘s teinn, ar n-ainneirt chruaidh,
‘S ar sliochd an sàs na’n traillibh truagh’;
O’r cuislibh tràight’ air sgàth ar sluaigh,
Thig saorsa bhuan le sìth

Biodh uaibhrich sleucht’ fo’r beuma bàis;
Fear ainneirt dh’eug ‘nuair ghéilleas nàmh,
Tha saorsa fhéin a’m beum ‘ur làmh
‘Nis buaidh no bàs ‘san t-strìth.

Màiri Bhàn (air a bheil Mairi’s Wedding am Beurla)

2008-11-16T01:11:00.000-08:00

Òran ùr gàidhlig à 2005.

2008-09-04T11:00:00.000-07:00

Nuair a thig e gu h-aon is gu dhà le Steafan Risnidh agus Scott Coineagan

Ceart ma-tà. Tha mi gam thaisbeanadh fhèin an seo. Ach, cuimhnichibh nach eil an t-òran a-nis ri fhaotainn, mar sin chan eil mi feuchainn ri dad sam bith a reic! Cha do rinn mi fhìn ach na faclan agus fonn a chur air a’ cheòl a chuir Scott Coineagan ri chèile air a’ ghiotàir aige ann an Dùn Dèagh.

Chaidh seo a chlàradh aig a’ BhBC aig a’ chuairt dheireannaich dhen fharpais Seo Seinn 2005. Cha deach sinne troimhe chun chuairt dheireannaich, ach dh’ iarr iad oirnn an t-òran againn a ghabhail co-dhiù.

Cha robh dùil againn gun iarradh iad oirnn, agus sinn air an talla a ruigsinn a dh’ fhaicinn an fheadhainn a fhuair trompa. Mar sin cha robh an giotàir aig Scott còmhla ruinn, agus bha sinn air botal fìon no dhà a shlugadh sìos mu uair a thìde roimhe! Chaidh ar toirt ann an cabhag le tè an dorais sa chàr aice ach am faigheadh sinn an giotàr aig Scott. Ràinig sinn an ùrlar ann an tìde, ach air èiginn!

Sin agaibh e. Faodaidh sibh am breithneachadh agaibh fhèin a dhèanamh air ciall nam faclan, ach ueill, bha rudeigin nam smaointean nuair a sgrìobh mi iad.

An t-eilean mu thuath

2007-04-19T20:28:00.000-07:00

Faclan às an leabhair “Eilean Fraoich – Lewis Gaelic Songs and Melodies” foillsichte le Acair.

An t-eilean mu thuath, an iomall a` chuain,
An t-eilean san d`fhuair mi m` àrach;
Far an d`fhuair mi `s mi òg bainne fìorghlan ri òl,
`S bha m`anam tighinn beò `s a` fàs leis.

An t-eilean a tuath, an t-eilean tha fuar,
`S e Leòdhas bho thuath mo ghràidh e,
Far nach cluinn mi ri m` bheò bhith sealg no bhith `g òl
No làmhadh no òrd air an t-Sàbaid.

Nach mis` tha gu truagh gu tùrsach `s fo ghruaim
Bho chuir mi ri tuath mo chùlaibh;
Nuair choisich i dian chuir i curs` oirre `n iar
`S thug dorchadas dhìomsa Mùirneag.

Chan eil math dhomh no stàth bhith tuiream sa chàs,
Chan aithreachas tràth a th` ann dhomh;
Chan urrainn mi snàmh gu cuideachd mo ghràidh
No coiseachd air tràigh do Leòdhas.

Mariah ri Whitney

2007-04-17T18:50:00.000-07:00

http://www.youtube.com/watch?v=q3ZzGjHKDdw

`S e mo bheachd fhèin nach cumadh Mariah Carey ceann a` mhaide ri Whitney Houston a thaobh seinn, mus do thòisich Whitney air na drogaichean. Chan e sin ri ràdh nach eil guth seinn àlainn aig Mariah. Tha e àlainn, cumhachdail, binn.

Ge-tà, tha faireachdainn ann nuair a bhios Mariah a` gabhail òran, gum bi i a` cleachdadh òran airson a` cur air adhart an guth aice fhèin seach bhith a` seinn airson adhbhar na h-òrain. Sin agad Mariah.

Bidh Whitney, air a chaochladh, a` cleachdadh an guth mìorbhaileach aice le gliocas gun a bhith a` seinn a-mach gun adhbhar. `S e an t-òran as cudthromaiche dhith, agus tha a` bhuil sin air an òran, agus air an luchd-èisteachd aice. Tha guth Whitney a` gluasad t`fhaireachdainn gu dlùth agus fiù `s a-niste, an dèidh an cron a chaidh a dhèanamh air, bha an dèanadas aice aig na World Music Awards ann an 2004 a` toirt snigheadh air mo chridhe. Mar a tha an sean-fhacail ag ràdh, “bheireadh e snigheadh air cridhe na cloiche”.

A` Mhairead Og – seann òran

2007-03-09T18:04:00.000-08:00

Tha cuid ag ràdh gur e Dòmhnall Donn Mac fear Bhoshuntain, a rinn an t-òran seo. Tha cuid, mar an ceudna, ag ràdh gun do rinneadh e le mac tuathanaich, do mhaighdean àlainn a bha na banaraich aig athair. A-rèir coltais, bha spèis mhòr aige don nighein, agus nuair a mhothaich a mhàthair dha seo, cha robh i idir toilichte. Air feasgar àraidh, chunnaic a mhàthair gun deach a` bhanarach ga failceadh, agus air dha mac tighinn dhachaigh, dh` innis i gum faca i tunnag àlainn air an abhainn. Gun tuilleadh a ràdh, ghlac an gille a ghunna `s thàr e às. Tha an t-òran ag innse mar a thachair.

A` Mhairead Og, `s tu rinn mo leòn
Is caileag bhòidheach lurach thu
`S tu as guirme sùil sa mhadainn chiùin
Nan dearc air chùl nan duilleagan

`S tu as guirme sùil sa mhadainn chiùin
Nan dearc air chùl nan duilleagan
Gur gil` thu ghràidh nan sneachda bàn
A` cur air àird nam monaidhean

Gur gil` thu ghràidh nan sneachda bàn
A` cur air àird nam monaidhean
Och `s i mo mhàthair rinn an call
Nuair chuir i shealg nan tunnaig mi

Och `s i mo mhàthair rinn an call
Nuair chuir i shealg nan tunnaig mi
`S nuair ràinig mi an linne chaol
`S ann bha mo ghaol a` srùthladh innt`

`S nuair ràinig mi an linne chaol
`S ann bha mo ghaol a` srùthladh innt`
`S e `n gunna caol a rinn mo leòn
Cha tèid e òirleach tuilleadh leam

`S e `n gunna caol a rinn mo leòn
Cha tèid e òirleach tuilleadh leam
`S an tè rinn dhomh-sa lèine chaol
Cha dèan thu ghaoil gin tuilleadh dhomh

`S an tè rinn dhomh-sa lèine chaol
Cha dèan thu ghaoil gin tuilleadh dhomh
Ged thèid mi suas don bhail` ud shuas
Cha bhi mo chuairt ach diomain ann

Ged thèid mi suas don bhail` ud shuas
Cha bhi mo chuairt ach diomain ann
Air leabaidh làir chan fhaigh mi tàmh
`S air leabaidh àird cha chuir iad mi

Air leabaidh làir chan fhaigh mi tàmh
`S air leabaidh àird cha chuir iad mi
O Rìgh nan dùl cum rium mo chiall
Cha robh mi riamh sa chunnart seo

O Rìgh nan dùl cum rium mo chiall
Cha robh mi riamh sa chunnart seo
Mi `n-diugh `s an-dè air cnoc leam fhèin
A` sileadh dheur `s mi turaman

Mi `n-diugh `s an-dè air cnoc leam fhèin
A` sileadh dheur `s mi turaman
A Mhairead Og `s tu rinn mo leòn
`S tu dh`fhàg fo bhròn `s fo mhulad mi.

Tionndadh Beurla:

Young Margaret, you are the cause of my grief
A bonnie, lovely girl you are
Your eyes are bluer in the calm morning
Than the blaeberry amongst the leaves

You are more radiant my love than
The white snow that falls on the moorland

It was my mother that did wrong
When she sent me to hunt for the ducks

When I got to the narrow pool
It was my love that was bathing there

It was the slender gun that wounded me
It won`t travel an inch more with me

The girl who made for me the shirt of fine cloth
Shall make no more

Even if I go to the village up yonder
My visit will be short-lived

On a low bed, I`ll get no rest
And on a high bed, they`ll not place me

Oh King of the Elements, keep me sane
I have never been in such danger

Today and yesterday alone on a hill
Shedding tears and rocking myself in grief

Oh young Mairead, you are the cause of my grief
You`ve left me desolate and grief-stricken.

Maighstir Bush, a charaid chòir. Dear Mr President.

2007-03-09T06:31:00.000-08:00

http://www.youtube.com/watch?v=9eDJ3cuXKV4

Ged a sheòl mi air m` aineol, cha laigh smalan air m`inntinn

2007-02-10T19:25:00.000-08:00

Bruth air an dealbh gus an CD seo a cheannach.

Although I`ve sailed to lands unknown, Sadness will not linger in my mind.

Tha lionn-dubh aig mo mhàthair is dùil aic` nach till mi.

My mother is dejected because she does not expect me to return.

An aithne dhuibh na sreathan tha seo? Thug mi às òran iad le Roderick Morrison, Drummondville, Siorrachd Richmond ann an Canada. `S e sin òran a rinn Julie Fowlis air an clàr ùr aice “Mar a tha mo chrìdhe”. Mholainn-sa an clàr seo do neach sam bith aig am bheil spèis do cheòl Gàidhealach.

Tha clàr ùr eile aice, air am bheil “Curaidh”, gu bhith tighinn a-mach sa Mhàirt. Tha fadachd mòr orm ris.

Tha m`eudail is m`aighear `s mo ghràdh

2007-02-01T19:35:00.000-08:00

powered by ODEO

Tha an t-òran seo gun ainm, fhad `s as aithne dhomh. Fhuair mi e bho Chairistìona Primrose aig Sabhal Mòr Ostaig.

Tha m`eudail `s m`aighear `s mo ghràdh
Ag iomain a ghnàth nam bò
Chan iarrainn a dh`iochshlaint no shlàint
Ach faighinn a ghràidh ort còir
`S cha bhi mise tuilleadh ach tinn
Gu faigh mi ort snaidhm nach sgaoil
Le aont a` bhodaich bha thall
Na shuidh ann an Gleann an Fhraoich.

Oir chunnaic mi mais` annad fhèin
Nach fhaca mi `n tè ta beò
`S chan fhaca mi gin air an fhèill
A ghabhainn romhad fhèin `s tu beò
`S tu fhèin a bha labhairt le ciall
`S a` labhairt le briathran sìth
`S roimh aon de do chàirdean gu lèir
Gun ghoid thu dhuit fhèin mo chrìdh`.

Mo Mhollachd aig na Caoraich Mhòr le Eòghann MacDhonnchaidh

2007-01-23T18:53:00.000-08:00

powered by ODEO

Mo mhollachd aig na caoraich mhòr',
Càit bheil clann nan daoine còir?
Dhealaich rium nuair bha mi òg,
Man robh Dùthaich ic Aoidh 'na fàsach.

Tha tri fichead bliadhn' 's a trì,
On a dh'fhàg sinn Dùthaich Mhic Aoidh.
Càit bheil gillean glan mo chridh,
'S na nìghneagan cho bòidheach?

Loch mo chridhe fhuair thu bàs,
Ma fhuair thu ceartas fhuair thu blàths;
Gun caill an Donas an làmh cheàrr,
Mur bi e càirdeil còir riut.

Andersonaich bh'air an ceann,
On thog an t-seilcheag suas a ceann,
An t-àit as mios', on tha thu ann,
Cha d'fhuair e ceàrd cho mòr riut.

Bhain-Diùc Chataibh, bheil thu'd dhìth?
Càit bheil nis do ghùntan sìod'?
An do chùm iad thu bho'n oillt` 's bho'n stri,
Gun gineal measg nan clàraibh.

Shellair bhiorach tha san ùir,
Ma fhuair thu'n gras ris 'n robh do dhùil,
'N teine leis do chuir thu'n tuath fo ruaig
Tha fuaim aig nis ri t'fheusag.

Chiad Dhiùc Chataibh led chuid foill,
'S led chuid càirdeis do na Goill,
Gum b'ann an Iutharn 'n bha do thoill,
'S gum b'fheàrr leam Iùdas làmh rium.

O mo mhollachd aig an sguad
A chuir Clann Mhic Aoidh fo ruaig,
On a' mhonadh gus a' chuan,
Gun tigh, gun bual, gun chrò ac'.

An eala bhàn le Dòmhnall Ruadh Chorùna

2007-01-19T08:26:00.000-08:00

Bha Dòmhnall Ruadh na shaighdear sa Chiad Chogadh Mòr agus e ag iondrainn a leanann san òran seo.`S ann à Uibhist a Tuath a bha e.

Gur muladach a tha mi
`s mo chrìdhe `n sàs aig bròn,
bhon an uair a dh`fhàg mi
beanntan àrd a` cheò:
gleanntaichean a` mhànrain –
nan loch, nam bàgh `s nan sròm,
`s an eala bhàn tha tàmh ann
gach là air a bheil mi `n tòir.

A Mhagaidh, na bi tùrsach,
A rùin, ged gheibhinn bàs.
Cò am fear am measg an t-sluaigh
A mhaireas buan gu bràth?
Chan eil sinn uileadh ach air chuairt,
Mar dhìthein buail` a` fàs,
Bheir siantanan na bliadhna sìos,
`s nach tog a` ghrian an àird.

Tha mis` an-seo `s mo shùil san iar
On chrom a` ghrian san t-sàl:
Mo dhùrachd leig mi as a dèidh,
Ged thrèig i mi cho tràth,
Gun fhios gum faic mi màireach i
Nuair dhìreas i gu h-àrd,
Is iomairt lann gu bhith ri chèil`
Nuair `s lèir dhuinn beul an là.

Tha `n talamh lèir mun cuairt dhìom
Na mheallan suas `s na neòil
Aig na shells a` bualadh –
Cha lèir dhomh bhuam le ceò;
Gun chlaisneachd aig mo chluasan
Le fuaim a` ghunna mhòir,
Ach ged tha `n uair seo cruaidh orm
Tha mo smuaintean air NicLeòid.

Air m`uilinn anns na truinnseachan
Bha m`inntinn ort, a ghràidh;
Nam chadal bidh mi bruadar ort –
Cha dualach dhomh bhith slàn:
Tha m`aigne air a lìonadh
Le cianalas cho làn,
`s a ghruag a dh`fhàs cho ruadh orm
a-nis air thuar bhith bàn.

Mas e `s gu bheil e `n dàn dhomh
On bhlàr gun till mi beò,
Is gum faic mi an t-àite
San deachaidh m`àrach òg,
Bidh sinne, `s crathadh làmh againn
Is bilean blàth, toirt phòg,
`s mo ghealltanas bidh pàighte dhuit
le fàinne chur mud mheòir.

Oidhche mhath leat fhèin, a rùin,
Nad leabaidh chùbhraidh bhlàth,
Cadal sàmhach air a chùl
`s do dhùsgadh sunndach, slàn;
tha mise `n-seo san truinnsidh fhuair
`s nam chluasan fuaim a` bhàis,
gun dùil ri faighinn às le buaidh –
tha `n cuan cho buan ri shnàmh.

Fògradh ar Gàidheil le Murchadh Mac a` Ghobhainn à Luerbost, Eilean Leòdhais (1880-1936)

2007-01-06T00:28:00.000-08:00

powered by ODEO
Mo shoraidh leis na fuar-bheannan
`S na glinn san robh mi buachailleachd
Is duilich leam mar dh`fhuadaicheadh
An sluagh bha annta còmhnaidh

Tha sliochd nan suinn a dh`àiticheadh
Na glinn ud a chaidh fhàsachadh
An-diugh mar Ghoill gun Ghàidhlig ac`
Air sràidean bhailtean mòra

Chan fhaic mi feadh nan garbhlaichean
Ach cìobairean is sealgairean
Nach buin do thìr nan Albannach
Ged fhuair iad seilbh is còir oirr`

Chan fhaic thu leac nan teintean ann
Le mnàthan òg is maighdeanan
Is fuaim ac` air na cuibhlichean
A` snìomh gu grinn a` chlòtha

Cha b`iongnadh ged a bhàsaicheadh
An cànain milis màthaireil
Cha labhair fèidh nam fàsaichean
`S tha a` chaora bhàn gun chòmhraidh

Brisibh sìos na h-oighreachdan
`Us roinnibh oirnn gu caoimhneil iad
`Us àirichidh sinn saighdearan
A chumas nàimhdean fòpa

Biodh maighstir sgoile bàigheil ann
A labhras Beurla `s Gàidhlig ruinn
`S a dh`ionnsaicheas na pàisdean
Sa chànain Ghàidhlig bhòidhich.